"DogruXeber.az" xəbər verir ki, bu il Azərbaycan Polisinin yaranmasının 107 illiyi tamam olur. Hər bir ölkənin hüquq-mühafizə sistemi onun suverenliyinin və təhlükəsizliyinin əsas sütunlarındandır. 107 ildir ki, Azərbaycan polisi də bu missiyanı ləyaqətlə yerinə yetirir – xalqın və dövlətin keşiyində dayanır.

Azərbaycan Respublikasında polis orqanlarının əsası 1918-ci il iyulun 2-də, Azərbaycan Xalq Cümhuriyyəti Nazirlər Şurasının qərarı ilə qoyulub. Həmin tarixdə daxili işlər sistemində nizami və milli hüquq-mühafizə strukturu yaradılaraq ölkənin ilk müstəqil polis qurumu fəaliyyətə başlayıb. Bu səbəbdən hər il iyulun 2-si ölkəmizdə Polis Günü kimi qeyd olunur.

Sovet dövründə də fəaliyyətini davam etdirən polis orqanları müstəqillikdən sonra, xüsusilə 1990-cı illərin ağır ictimai-siyasi şəraitində, separatçılıq və cinayətkarlığa qarşı əsl mübarizə apararaq dövlətin qorunmasında mühüm rol oynamışdır. Polis əməkdaşlarının bir qismi bu yolda şəhidlik zirvəsinə ucalaraq qəhrəmanlıq salnaməsinin müəllifinə çevrilib.

Azərbaycan Respublikası daxili işlər orqanlarında bu gün müşahidə olunan sistematiklik, peşəkarlıq və yüksək nizam-intizam bilavasitə Daxili İşlər naziri, general-polkovnik Vilayət Eyvazovun rəhbərliyi ilə həyata keçirilən islahatların nəticəsidir.

Nazir Eyvazovun idarəçiliyi dövründə:

cinayətkarlıqla mübarizə daha mütəşəkkil və elmi əsaslara söykənən mexanizmə çevrilib;

narkotik vasitələrin qanunsuz dövriyyəsi, qeyri-leqal silah saxlama və insan alveri kimi ağır cinayət növlərinə qarşı kompleks tədbirlər görülüb;

daxili işlər sistemində şəffaflıq, hesabatlılıq və daxili nəzarət gücləndirilib;

vətəndaş müraciətlərinə baxılması sahəsində əhəmiyyətli irəliləyişlər əldə olunub.

Ən başlıcası isə – ictimai asayişin etibarlı qorunması, əhalinin hüquq və azadlıqlarının müdafiəsi və polis-vətəndaş münasibətlərində inamın artırılması istiqamətində böyük nəticələr var.

Daxili İşlər Nazirliyinin fəaliyyətində media ilə düzgün və peşəkar kommunikasiya da xüsusi əhəmiyyət daşıyır. Son illər bu sahədə mətbuat xidmətinin rəhbəri Elşad Hacıyevin fəaliyyəti cəmiyyət tərəfindən yüksək dəyərləndirilir.

Elşad Hacıyev təkcə rəsmi açıqlamalar verməklə kifayətlənmir, həm də sosial şəbəkələrdəki aktivliyi, ictimai narahatlığa çevrilmiş məsələlərə çevik münasibəti və real mövqeyi ilə jurnalistlər, hüquqşünaslar və vətəndaşlar arasında etibarlı informasiya mənbəyinə çevrilib. Onun hər hansı hadisə ilə bağlı operativ paylaşmaları və mədəni üslubu həm vətəndaşın hüquqi maariflənməsinə, həm də ictimai etimadın qorunmasına xidmət edir.

Eyni zamanda, DİN-in digər mətbuat nümayəndəsi, Nurlan Əliyev də mətbuat və ictimaiyyətlə əlaqələrdə nümunəvi yanaşması ilə seçilir. Jurnalist müraciətlərinə tez və dolğun cavab verməsi, hadisələrə münasibətdə çevik informasiya dəstəyi göstərməsi onun bu sahədə peşəkar və etibarlı sima olduğunu təsdiqləyir.

Bu yanaşmalar nəticəsində daxili işlər orqanları cəmiyyətdən və mətbuatdan qopmadan, əksinə onların dəstəyini qazanaraq daha açıq və effektiv fəaliyyət göstərir.

107 illik yol sadəcə tarix deyil – bu yol qanunla, cəsarətlə və fədakarlıqla yazılıb. Bu gün Azərbaycan polisi nəinki cinayətkarlıqla mübarizədə, həm də vətəndaşların gündəlik təhlükəsizliyində, dövlət tədbirlərinin mühafizəsində və fövqəladə hallarda insanların yardımına yetişməkdə fəal rol oynayır.

Qarabağda həyata keçirilən antiterror tədbirlərində, sərhəddə baş verən insidentlərdə, təbii fəlakətlər zamanı aparılan xilasetmə və dəstək proseslərində də polis əməkdaşlarının əzmkarlığı və peşəkarlığı bir daha göz önünə çıxıb.

Azərbaycan Polisinin 107 illik yubileyi təkcə rəsmi təqvim hadisəsi deyil – bu, hüququn yaşadılmasının, dövlətin qorunmasının və xalqın xidmətində olmağın tarixidir.

"DogruXeber.az" kollektivi olaraq, bu şərəfli və çətin missiyanı daşıyan bütün polis əməkdaşlarını təbrik edir, qanunun və dövlətin keşiyində mətin dayanan bu peşə sahiblərinə minnətdarlığımızı bildiririk.