Bu gün Azərbaycan televiziyasında baş verənlər əksər ictimai təbəqələrdə narahatlıq doğurur. Bir vaxtlar maarifləndirici və mədəni dəyərləri təbliğ edən TV kanallarımız, bu gün reytinq xatirinə səviyyəsizlik yarışına çıxıb. “DogruXeber.az” olaraq məsələni dərindən təhlil etdik.

Ən çox yayımlanan verilişlərə baxanda görürük ki, ya süni qalmaqallar, ya boş-boşuna uzanan şəxsi dramlar, ya da iştirakçıların bir-birinə qışqırdığı səviyyəsiz debatlar efir vaxtını tutur. Tamaşaçıya real həyatın problemlərini göstərmək, onu maarifləndirmək və düşündürmək əvəzinə, onu təkcə əyləndirməyə çalışan, özü də aşağı səviyyədə əyləndirməyə çalışan verilişlər üstünlük təşkil edir.

Efirdə müğənnilərin şəxsi həyatı, ailə qalmaqalları, sənətdən uzaq “sənətçilər”in suni qəzəbləri, həyatı ilə “şou” düzəldənlərin “baş rolları” izləyiciyə təqdim olunur. Bu hal təkcə estetik zövqü deyil, ümumilikdə cəmiyyətin əxlaq anlayışını da korlayır. Bu cür verilişlərdə gənclər üçün bir dəyər yoxdur, əksinə, onları tənbəlliyə, boş həyat tərzinə və mənasız məşhurluq arzusuna sürükləyir.

Əslində televiziya həm də maarifləndirmə vasitəsidir. Ancaq bu gün maarifləndirici, ədəbi-bədii, tarixi və elmi verilişlər ya ümumiyyətlə yayımlanmır, ya da elə bir vaxtda verilir ki, izləyən olmur. Əvəzində isə hər gün eyni simalarla eyni məzmunlu “show”lar efirdədir. Sanki televiziya rəhbərləri xalqın səviyyəsinə yox, yalnız reytinq cədvəlinə cavab verməyə çalışırlar.

Nə Etməliyik?

- Milli Televiziya və Radio Şurası (MTRŞ) bu məsələyə ciddi yanaşmalı, proqram siyasətini yoxlamalıdır;
– Dövlət, mədəniyyət və maarifləndirici kontentə dəstək verməlidir;
– Televiziya rəhbərləri reytinqin deyil, ictimai dəyərin arxasınca getməlidirlər;
– Tamaşaçılar da sosial mediada və ictimai müzakirələrdə etirazlarını bildirməlidirlər.

"DogruXeber.az" olaraq hesab edirik ki, televiziyalar cəmiyyətin aynası olmaq vəzifəsini yerinə yetirməlidir. Bu gün o ayna buxarlanıb. Onu təmizləmək isə ictimai təzyiq və vicdanlı medianın əlindədir.