Ukrayna Müdafiə Qüvvələrinin Kursk vilayətində əməliyyatını şərh edən ABŞ rəsmiləri hadisələrin gələcək inkişafı ilə bağlı "narahatlıqlarını” getdikcə daha çox ifadə edirlər.

"Kanal14.az" xəbər verir ki, bu barədə "NBC News” öz mənbələrinə istinadən məlumat yayıb.

Vaşinqton rəsmiləri xəbərdarlıq edir ki, Ukrayna Silahlı Qüvvələri Rusiya ərazisində həddən artıq genişlənə bilər.

Materialda həmçinin bildirilir ki, Kreml hazırda Ukrayna Müdafiə Qüvvələrinin Kursk vilayətində gözlənilməz hücumuna təsirli cavab tədbirləri təşkil etməyə çalışır, bu isə onu öz ərazisində müdafiəni gücləndirmək üçün Ukraynadakı qoşunların bir hissəsini cəbhədən yayındırmağa məcbur edib.

"Ancaq Rusiyanın Ukraynadan çıxarmalı olduğu qoşunların sayı o qədər də böyük deyil. Rusiya hələ ki, Ukrayna qüvvələrinin nəzarəti altında olan əraziləri geri almaq üçün kifayət qədər döyüş gücünü səfərbər etməyib”, - amerikalı rəsmilərdən biri bildirib.

Mənbələrin dediyinə görə, Ukrayna Silahlı Qüvvələri Rusiya torpaqlarında döyüşən qoşunları dəstəkləməyə və şərqdə Rusiyanın hücumlarını dəf etməyə çalışarkən, təchizat xətlərinin yüklənə biləcəyi riski var.

"Bu, narahatlıq doğurur", - nəşrin həmsöhbətlərindən biri əlavə edib.